«ՀայաՔվեն» ազգային քաղաքացիական միավորում է, որի նպատակն է կանխել Հայաստանի Հանրապետության կապիտուլյացիան, հասնել Հայաստանում գործող ապազգային իշխանության հեռացմանը, արդյունավետ նոր ազգային իշխանության ձևավորմանը, և դրա միջոցով Հայաստանի անվտանգ ու կայուն զարգացմանը, ինչպես նաև Արցախի վերահայացմանը։
«ՀայաՔվեն»` որպես նախաձեռնություն
«ՀայաՔվեն» ձևավորվել է որպես անկախ Հայաստանի պատմության մեջ առաջին քաղաքացիական օրենսդրական նախաձեռնություն, որն առաջարկում էր քրեականացնել Հայաստանի Հանրապետության անունից Արցախն այլ պետության կազմում ճանաչելը և Հայոց ցեղասպանության նշանակությունը նսեմացնելը։
«ՀայաՔվեն» ՀՀ քրեական օրենսգրքում լրացում կատարող մի նախագիծ էր կազմել, համաձայն որի՝ Հայաստանի Հանրապետության անունից Արցախն այլ պետության մաս ճանաչող և/կամ Հայոց ցեղասպանության նշանակությունը նսեմացնող պաշտոնատար անձը պատժվում է 10-ից 15 տարի ազատազրկմամբ։
Սահմանված ժամկետից էլ պակաս ժամանակահատվածում հավաքվեց անհրաժեշտ 50 հազարից էլ ավելի՝ ՀՀ 58 հազար քաղաքացու ստորագրություն, և այս առաջարկությունն օրենքի ուժով քննարկվեց ՀՀ Ազգային ժողովում։ Կառավարող քաղաքական մեծամասնությունը, սակայն, կոպտորեն ոտնահարեց ՀՀ տասնյակ հազարավոր քաղաքացիների առաջարկած օրենսդրական նախաձեռնությունը և այն նույնիսկ չընդգրկեց ՀՀ ԱԺ լիագումար նիստերի օրակարգ։
«ՀայաՔվեն» այսօր
Այսօր «ՀայաՔվեն» զբաղված է քաղաքական նոր օրակարգի ձևավորմամբ՝ որպես արմատական այլընտրանք գործող վարչախմբի ուղեգծին։ «ՀայաՔվե» միավորման կառավարման գործադիր մարմինը վարչությունն է, որը բաղկացած է ինն անդամից և ընտրվում է խորհրդի կողմից՝ մեկ տարով։
Միավորման խորհուրդն ընդունում է ռազմավարական զարգացման հետ կապված բոլոր որոշումները, ընտրում է վարչության անդամների և համակարգողի։ «ՀայաՔվե» միավորման հիմնական գործառնական կառույցներն են ոլորտային և ծրագրային հանձնախմբերը և տարածքային կառույցները Երևան քաղաքում և ՀՀ մարզերում։
